सरकारद्वारा १४ जिल्ला सङ्कटग्रस्त क्षेत्र घोषणा
तु खबर संवाददाता
काठमाडौं । सरकारले देशको १४ जिल्लालाई सङ्कटग्रस्त जिल्ला घोषणा गरेको छ ।
प्रधानमन्त्री तथा मन्त्रीपरिषद्को कार्यालय सिंहदरबारमा शुक्रबार बसेको मन्त्रीपरिषद् बैठकले काठमाडौं, भक्तपुर र ललितपुरसहित १४ जिल्लालाई सङ्कटग्रस्त जिल्ला घोषणा गरेको हो ।
बैठकले अविरल वर्षाका कारण बाढी र पहिरोले क्षति पुर्याएका १४ जिल्लालाई सङ्कटग्रस्त जिल्लाको रूपमा घोषणा गरेको गृहमन्त्री रमेश लेखकले जानकारी दिए ।
उनका अनुसार, बाढी, पहिरो र डुबानबाट सबैभन्दा धैरै मानवीय तथा भौतिक क्षति भएका जिल्ला पाँचथर, ओखलढुङ्गा, उदयपुर, सर्लाही, रौतहट, सिन्धुली, मकवानपुर, चितवन, ललितपुर, सिन्धुपाल्चोक, धादिङ, दोलखा, रामेछाप र काभ्रे जिल्ला र ती जिल्लाका विभिन्न स्थानीय तहलाई सङ्कटग्रस्त घोषणा गरिएको हो ।
गत शुक्रबार र शनिबार देशैभर अविरल वर्षा हुँदा ठुलो जनधनको साथै मानवीय क्षति भएको थियो । सरकारले बाढी–पहिरोले सबैभन्दा बढी क्षति भएका जिल्लालाई उच्च प्राथमिकता दिएर काम गर्न सङ्कटग्रस्त जिल्ला घोषणा गरेर काम गर्न लागेको उनले बताए ।
यसअघि राष्ट्रिय विपत् जोखिम न्यूनीकरण तथा व्यवस्थापन प्राधिकरण कार्यकारी समितिको शुक्रबार बसेको बैठकले बाढी–पहिरो र डुबानबाट बढी प्रभावित ती जिल्लालाई विपद् सङ्कटग्रस्त क्षेत्र घोषणा गर्न सिफारिस गरेको थियो ।