साफ वुमन्स च्याम्पियनसिपको फाइनल आज, घरेलु टोली र बंगलादेश भिड्दै
तु खबर संवाददाता
काठमाडौं । साफ वुमन्स च्याम्पियनसिपको फाइनल खेल आज हुँदैछ । उपाधिको लागि घरेलु टोली नेपाल र बंगलादेश भिड्दैछ ।
फाइनल खेल नेपाली समय अनुसार, आज साँझ ६ः३० बजेबाट सुरु हुनेछ । खेल काठमाडौंको त्रिपुरेश्वरस्थित दशरथ रंगशालामा हुने अखिल नेपाल फुटबल संघ (एन्फा) ले जनाएको छ ।
साथै एन्फाले साँझ ५ बजेभित्र रंगशाला प्रवेश गरिसक्न समेत सबैलाई आग्रह गरेको छ । प्रतियोगिता हेर्न चाहानेको लागि एन्फा आफैले टिकट बिक्री गर्न लागेको एन्फा टुर्नामेन्ट डाइरेक्टर सञ्जीव मिश्रले जानकारी दिए ।
उनका अनुसार, यसअघि आइतबार भएको नेपाल र भारतबीचको खेलमा क्षमताभन्दा बढी दर्शकलाई टिकट बिक्रीमा रोक लगाएर आफैले बिक्री गर्न लागेको हो ।
आज बिहान ८ बजेदेखि जावलाखेलमा भौतिक रुपमा मात्रै टिकट किन्न पाइने व्यवस्था गरिएको उनले बताए । यस्तै, एन्फा कम्प्लेक्स, भद्रकाली आर्मी गेट र जावलाखेल मैदानबाट पनि टिकट बिक्री गरिने उनले बताए ।
उनले ११ हजार टिकटमात्र बिक्री गरिने भन्दै साधारणतर्फ १० हजार र भीआईपीमा १ हजार टिकट बेच्ने बताए ।
त्यहाँ प्यारापिट १५ हजार क्षमताको छ । साथै यसअघि फाइनल खेल हेर्न अनलाइन टिकट खरिद गरेकाहरुको रकम फिर्ता गरिने उनले बताए ।
टिकटको मूल्य ५ सय र एक हजार रुपैयाँ तोकिएको छ । जसअनुसार एकजना दर्शकले साधारण प्यारपिटतर्फ बढीमा ५ वटा र भीआईपीतर्फ २ वटामात्रै किन्न पाउने उनले बताए ।
