ट्रक दुर्घटनामा परेर एक जनाको घटनास्थलमै मृत्यु
तु खबर संवाददाता२०८१ कार्तिक २३,शुक्रबार १८:२०
पाँचथर । पाँचथरको हिलिहाङ गाउँपालिका वडा नम्वर ६ मा ट्रक दुर्घटनामा परेर एक जनाको मृत्यु भएको छ ।
जिल्लाको हिलिहाङ २ सिंगापुरदेखि गोलिया लिएर झापा हिँडेको ना ४ ख ७१२३ नम्बरको ट्रक अनियन्त्रित भएर सडकदेखि करिब ५० मिटर तल खसेर दुर्घटना हुँदा एक जनाको मृत्यु भएको हो ।
मृत्यु हुनेमा ट्रकमा सवार पाँचथरको हिलिहाङ ३ निवासी भवानी शंकर पौडेल रहेका छन् । उनको दुर्घटनामा परेर घटनास्थलमै मृत्यु भएको प्रहरीले जनाएको छ ।
यस्तै, सोही दुर्घटनामा परेर चालकसहित दुई जना घाइते भएका छन् । दुर्घटनामा इलाम सुर्योदय नगरपालिका १२ घर भएका ५२ वर्षीय तेजबहादुर दाश र ट्रक चालक झापा चारपाने निवासी ४० वर्षीय राजकुमार बस्नेत घाइते भएका हुन् ।
घाइते दुवै जनालाई पाँचथर अस्पतालमा प्राथमिक उपचारपछि झापा पठाउने तयारी भइरहेको प्रहरीले जनाएको छ ।
