मकवानपुरमा भिरबाट लडेर वृद्धको मृत्यु

मकवानपुर । मकवानपुरमा भिरबाट लडेर एक वृद्धको मृत्यु भएको छ । जिल्लाको राक्सिराङ गाउँपालिका वडा नम्वर ८, रातोडाँडा बस्ने ८१ वर्षीय सिंहबहादुर ब्लोनको भिरबाट लगेर मृत्यु भएको मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, सोमबार घरदेखि अन्दाजी ३० मिटर दक्षिणतर्फ पर्ने जंगलमा घाँस काट्न पुगेका ती वृद्धका खट्टा चिप्लिएर भिरबाट लड्दा मृत्यु भएको हो ।

भिरबाट लडेर उनी गम्भीर घाइते भएका थिए । घाइते उनलाई तत्काल उद्दार गरी घरमा ल्याई उपचारको लागि अस्पताल पठाउने क्रममा घरमै मृत्यु भएको प्रहरी नायव उपरीक्षक अर्यालले बताए ।

मृतक वृद्धको शव पोष्टमार्टमको लागि हेटौंडा अस्पतालमा ल्याइएको र घटनाको बारेमा आवश्यक अनुसन्धान भइरहेको प्रहरी नायव उपरीक्षक अर्यालले बताए ।