अपडेटः दार्चुला दुर्घटनामा मृत्यु हुनेको संख्या ८ पुग्यो
तु खबर संवाददाता
दार्चुला । दार्चुलामा आज बिहान भएको जीप दुर्घटनामा परेर मृत्यु हुनेको संख्या ८ पुगेको छ । उक्त दुर्घटनामा परेर थप एक जनाको मृत्यु भएसँगै मृतकको संख्या ८ पुगेको हो ।
मालिकार्जुन जात्राबाट गोकुलेस्वरतर्फ गइरहेको म १ ज ३३८ नम्बरको जीप शैल्यशिखर नगरपालिका–५ मा पर्ने सिराडको खोलामा दुर्घटना भएको थियो ।
दुर्घटनामा परेर मृत्यु हुनेहरुमा शैल्यशिखर–५ लेकगाउँका ३० वर्षीय वीरेन्द्र रावल, २८ वर्षीय शान्ति रावल, शैल्यशिखर–९ नकतडका ४५ वर्षीय दिलीप विष्ट, बैतडीको डिलाशैनी–५ का १५ वर्षीय सञ्जीव बोहरा, वीरेन्द्र बोहरा, शैल्यशिखर नगरपालिका–९ नकतडकी ४० वर्षीय मिना लेखक तथा भारतको उत्तर प्रदेश विजनौर जिल्लाका ४५ वर्षीय मोहमद सफिर र १८ वर्षीय मोहमद बसिम छन् ।
मृतकमध्ये एक जनाको भने नाम, थर, बखत खुल्न बाँकी रहेको प्रहरीले जनाएको छ ।
सो दुर्घटनामा परेर अन्य ५ जना गम्भीर घाइते भएका छन् । उक्त घटनाको बारेमा प्रहरीले आवश्यक अनुसन्धानका गरिरहेको छ ।
