स्थानीय तह उपनिर्वाचनको लागि उम्मेदवारको मनोनयन आज

काठमाडौं । आसन्न स्थानीय तह उपनिर्वाचनका लागि आज मनोनयनपत्र दर्ता हुने भएको छ । यही मङ्सिर १६ गते हुने उपनिर्वाचनका लागि आज बिहान १० बजेदेखि अपराह्न ५ बजेसम्म मनोनयपत्र दर्ता गरिने भएको हो ।

निर्वाचन आयोगका सहसचिव एवम् प्रवक्ता निता पोखरेल अर्यालका अनुसार, उपनिर्वाचन हुने सम्बन्धित स्थानीय तहमा स्थापना भएका निर्वाचन अधिकृतको कार्यालयमा उम्मेदवारको मनोनयन दर्ता हुनेछ ।

उम्मेदवारको मनोनयन दर्ताको सम्पूर्ण तयारी पूरा भएको र आजै साँझ ५ देखि ६ बजेसम्म उम्मेदवारको सूची सार्वजनिक गर्ने आयोगले जनाएको छ ।

उपनिर्वाचन हुने स्थानीय तहमा ३२ वटा मुख्य निर्वाचन अधिकृतका कार्यालय र छ वटा निर्वाचन अधिकृतका कार्यालय स्थापना गरिएका निर्वाचन आयोगले जनाएको छ ।

देशभरको विभिन्न ४४ पदमा उपनिर्वाचन हुन लागेको हो ।