हेटौंडामा टी–१० क्रिकेट प्रतियोगिता हुँदै

मकवानपुर । मकवानपुरको हेटौंडामा टी–१० क्रिकेट प्रतियोगिता हुँदैछ । मुस्लिम इत्तेहाद संगठन जिल्ला कार्यसमिति मकवानपुरको आयोजनामा  उक्त प्रतियोगिता हुन लागेको हो ।

आइतबार पत्रकार सम्मेलनमार्फत्  प्रतियोगिताको सह–संयोजक प्रमोद मानन्धरले सो बारे जानकारी गराएका हुन् ।

मकवानपुर जिल्ला क्रिकेट संघको सहयोगमा हुने सो प्रतितोगिता यही मंसिर १२ गतेदेखि १५ गतेसम्म संचालन हुनेछ ।

प्रतियोगितामा बागमती प्रदेश र मधेश प्रदेशबाट १६ वटा समूहले सहभागिता जनाउने सह–संयोजक मानन्धरले बताए ।

नकआउट प्रणालीमा सञ्चालन हुने प्रतियोगिताको उद्घाटन खेल नेपाल स्टार क्लब र टिमबिल्ट फोर्टबीच प्रतिस्पर्धा हुनेछ । खेल बिहानको ८ बजेदेखि सुरु हुने उनले बताए ।

प्रतियोगिताको उपाधि विजेता र उपविजेता समूहले क्रमशः एक लाख रुपैयाँ र ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।

यसैगरी, उत्कृष्ट व्याट्सम्यान, उत्कृष्ट बलर, म्यान अफ द म्याच र प्रतियोगिताको उत्कृष्ट खेलाडीलाई पनि ट्रफी प्रदान गरिने आयोजकले जनाएको छ ।