मकवानपुरका दुई जना पक्राउ
तु खबर संवाददाता
मकवानपुर । मकवानपुर प्रहरीले अवैध लागूऔषधसहित आइतबार दुई जनालाई पक्राउ गरेको छ ।
प्रहरीले जिल्लाको मनहरी गाउँपालिका–९ भलादमी चोकस्थित सडकबाट अवैध लागूऔषध गाँजा १० किलो २ सय ५० ग्रामसहित दुई जनालाई पक्राउ गरेको हो ।
पक्राउ पर्नेहरुमा मनहरी गाउँपालिका–८ बस्ने २८ वर्षीय राम कुमार परियार र सोही गाउँपालिका–९ बस्ने ३६ वर्षीय रामकुमार स्याङबो रहेको जिल्ला प्रहरी कार्यालय मकवानपुरका प्रवक्ता एवम् प्रहरी नायव उपरीक्षक श्यामु अर्यालले जानकारी दिए ।
प्रवक्ता अर्यालका अनुसार, उनीहरुलाई इलाका प्रहरी कार्यालय मनहरीबाट खटिएको प्रहरी टोलीले पक्राउ गरेको हो ।
मनहरीबाट हेटौंडातर्फ जाँदै गरेको ना.१ ह ५०३३ नम्बरको अटोलाई जाँच गर्ने क्रममा उक्त गाँजा फेला पारी चालक परियार र अटोमा सवार स्याङबोलाई पक्राउ गरिएको हो ।
पक्राउ परेका दुबै जनामाथि प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।