उपनिर्वाचनः हेटौंडा–१२ मा मतदान सुरु

मकवानपुर । स्थानीय तह उपनिर्वाचन अन्तर्गत हेटौंडा उपमहानगरपालिका–१२ मा वडाध्यक्ष पदका लागि मतदान सुरु भएको छ । कडा सुरक्षा व्यवस्थापनका बिचमा २ मतदान स्थलमा बिहान ७ बजेबाट मतदान सुरु भएको हो ।

भोर्लेस्थित विष्णु आधारभूत विद्यालय मतदान केन्द्र र सिग्रेनीस्थित प्रतिभा आधारभूत विद्यालय मतदान केन्द्र गरी २ वटा मतदानस्थलमा ९ वटा मतदान केन्द्र तोकिएको छ ।

मतदान स्थलको बाहीरी घेरामा नेपाली सेना, भित्री घेरामा सशस्त्र प्रहरी र मतदान स्थलको पहिलो घेरामा आवश्यकता अनुसार नेपाल प्रहरी परिचालन गरिएको छ ।

सुरक्षा सुदृढ बनाउन राष्ट्रिय अनुसन्धान केन्द्र समेत परिचालन गरिएको छ । मतदानको लागि आज बेलुका ५ बजेसम्मका लागि समय तोकिएको छ ।

उक्त वडामा महिला मतदाता ४ हजार एक सय ७४, पुरुष मतदाता ३ हजार ८ सय ७८ र अन्य मतदाता १ जना गरी कुल ८ हजार ५३ मतदाता रहेको मुख्य निर्वाचन अधिकृतको कार्यालयले जनाएको छ ।

सो कार्यालयका अनुसार, भोर्लेमा ३ हजार ६ सय २५ र सिग्रेनीमा ४ हजार ४ सय २८ मतदाता रहेका छन् ।

गत २०७९ वैशाखमा सम्पन्न स्थानीय तह निर्वाचनबाट सो वडाको वडाध्यक्षमा निर्वाचित ललितबहादुर घलान जिल्ला समन्वय समिति (जिसस) मकवानपुरको प्रमुखमा निर्वाचित भएपश्चात सो पद रिक्त रहँदै आएको छ । रिक्त वडाध्यक्ष पदका लागि उपनिर्वाचन हुन लागेको हो ।

वडाध्यक्ष पदका लागि ९ जना राजनीतिक दलको तर्फबाट र ३ जनाले स्वतन्त्र तर्फबाट गरी १२ जनाको उम्मेदवारी रहेको छ ।

मतदान कार्य सम्पन्न भएलगत्तै हेटौंडा उपमहानगरपालिका–२ सिदार्थ माविमा मतगणना गर्ने तयारी गरिएको मकवानपुरका प्रमुख जिल्ला अधिकारी तीर्थराज चिलुवालले जानकारी दिए ।