उपनिर्वाचनः रिक्त ४१ पदका लागि शान्तिपूर्ण रूपमा मतदान जारी

काठमाडौं । स्थानीय तह उपनिर्वाचन अन्तर्गत आज देशभरका विभिन्न ४१ पदका लागि हाल मतदान जारी छ । स्थानीय तहमा रिक्त विभिन्न ४१ पदका लागि देशका विभिन्न स्थानमा शान्तिपूर्ण रूपमा मतदान भइरहेको हो ।

उक्त पदका लागि हुन लागेको निर्वाचनमा ३७६ जना उम्मेदवार मैदान उत्रिएका छन् । जिल्ला समन्वय समिति (जिसस) प्रमुख, नगरपालिका प्रमुख, उपप्रमुख, गाउँपालिका अध्यक्ष, उपाध्यक्ष र वडाध्यक्ष पदका लागि निर्वाचन भइरहेको हो ।

रिक्त ४४ पदमा राजनीतिक दलबाट कात्तिक २ मा मनोनयनपत्र दर्ता भएको थियो । जसमा तीन पदमा निर्विरोध निर्वाचित भएसँगै आइतबार ४१ पदमा मात्रै निर्वाचन भएको निर्वाचन आयोगले जनाएको छ ।

आयोगका अनुसार, ओखलढुङ्गा र कैलालीको जिल्ला समन्वय समिति प्रमुखमा क्रमशः नेपाली कांग्रेसका उम्मेदवार टेकराज भट्टराई र टीकाकुमारी चौधरी (भुल) निर्विरोध निर्वाचित भएका छन् ।

यस्तै, रुकुम (पूर्वी भाग) जिल्ला पुथा उत्तरगङ्गा गाउँपालिका वडा नं २ को वडा अध्यक्षमा नेपाल कम्युनिष्ट पार्टी माओवादी केन्द्रका उम्मेदवार जगत घर्ती निर्विरोध निर्वाचित भएका छन् ।

बाँकी ४१ पदका लागि साँझ ५ बजेसम्म मतदान हुनेछ ।