हेटौंडामा युथ १५ फुटबल प्रतियोगिता हुँदै

मकवानपुर । मकवानपुरको हेटौंडामा युथ १५ फुटबल प्रतियोगिता हुने भएको छ । पिप्ले युवा क्लब हेटौंडाको आयोजनामा यही मंसिर २७ गतेदेखि १५ वर्ष मुनीको पुरुष खेलाडीहरुको फुटबल प्रतियोगिता हुन लागेको हो ।

‘राष्ट्रिय खेलाडी बन्ने होड, उत्पादनमा जोड’ भन्ने नाराका साथ यू १५ एट ए साइड फुटबल प्रतियोगिता आयोजना गर्न लागिएको आयोजकले जनाएको छ ।

हेटौंडा–५ को मुख्य प्रायोजनमा हुन लागेको सो प्रतियोगिताको विजेताले ५० हजार र उपविजेताले २५ हजार रुपैयाँसहित ट्रफी प्राप्त गर्नेछन् ।

यस्तै, प्रतियोगिताको सर्वोत्कृष्ट खेलाडीले ५ हजार ५ सय रुपैयाँ र विधागत उत्कृष्टले जनही नगद ३ हजार ५ सय रुपैयाँसहित ट्रफी प्राप्त गर्नेछन् ।

प्रतियोगिता हेटौंडा–५ स्थित पिप्ले क्याम्पा रंगशालामा हुने आयोजक पिप्ले युवा क्लबका अध्यक्ष सुविन घिमिरेले बताए । उनका अनुसार, सो प्रतियोगितामा सहभागी टिम दर्ता गर्नुपर्ने र टिम दर्ता शुल्क ४ हजार रुपैयाँ तोकेको छ ।

बढीमा १६ टिमलाई मात्रै सहभागिता गराउने योजना रहेको उनको भनाई छ ।