मकवानपुरमा बस दुर्घटना, २२ जना घाइते

मकवानपुर । मकवानपुरको बकैया गाउँपालिका वडा नम्वर ५, तिनतले घुम्तीस्थित धरान–चतरा सडकखण्डमा बुधबार बस दुर्घटना भएको छ ।

बिहान पौने ११ बजेको समयमा हेटौंडाबाट छतिवनतर्फ जाँदै गरको बा ५ ख ६६५३ नं. को बस आँफै अनियन्त्रित भई सडकबाट अन्दाजी ५० मिटर तल खोल्सामा खसी दुर्घटना भएको हो ।

उक्त दुर्घटनामा परेर २२ जना घाइते भएको मकवानपुरका प्रहरी नायव उपरीक्षक एवम् प्रवक्ता श्यामु अर्यालले जानकारी दिए । उनका अनुसार, घाइते सबैको अवस्थामा सामान्य रहेको छ ।

प्रहरीले बस चालक हेटौंडा–१२, पदमपोखरी बस्ने वर्ष ४५ को टिकाराम लामालाई नियन्त्रणमा लिई घटनाको बारेमा आवश्यक अनुसन्धान गरिरहेको छ ।