मउवा संघको अध्यक्षमा प्रमोद सिं रानाभाटले गरे उम्मेदवारी घोषणा

मकवानपुर । मकवानपुर उद्योग वाणिज्य संघको नयाँ नेतृत्वका लागि प्रमोद सिं रानाभाटले उम्मेदवारी घोषणा गरेका छन् । संघको ३ वर्षे कार्यकालका लागि उनले अध्यक्ष पदमा उम्मेदवारी घोषणा गरेका हुन् ।

यही मंसिर २४ गतेदेखि २७ गतेसम्म हुने संघको ५८ औँ साधारणसभा तथा अधिवेशनबाट नयाँ नेतृत्व चयन गर्दैछ । त्यसका लागि उनले उम्मेदवारीको घोषणा गरेका हुन् ।

रानाभाटले आफ्नो उम्मेदवारी घोषणाका साथमा हेटौंडा–२ स्थित पल्पसा रोडमा सम्पर्क कार्यालयको उद्घाटन गरेका छन् । बुधबार उनका पिता डम्बरबहादुरले रिबन काटेर सचिवालय उद्घाटन गरेका हुन् ।

उम्मेदवारी घोषणापछि रानाभाटले व्यवसायीको हकहित र आर्थिक विकासका लागि आफूले ठोस काम गरेर देखाउने प्रतिवद्धता जनाए । व्यवसायीका समस्याहरूको सम्बोधन गर्दै संस्थालाई थप उचाइमा पुर्याउने लक्ष्यका साथ आफू अध्यक्ष बन्न चाहेको उनको भनाइ थियो ।

संघको नयाँ नेतृत्वका लागि अन्य प्रतिस्पर्धीहरुले पनि उम्मेदवारी घोषणा गरिरहेको छ । उक्त संघमा २ हजार भन्दा बढी उद्योगी व्यवसायी मतदाता रहेका छन् ।