गाँजासहित मकवानपुरबाट दुई जना पक्राउ
तु खबर संवाददाता
मकवानपुर । मकवानपुरबाट अवैध लागूऔषध गाँजासहित प्रहरीले मंगलबार दुई जनालाई पक्राउ गरेको छ । प्रहरीले जिल्लाको राक्सिराङ गाउँपालिका–५, ढुङगुखोलाको बगरबाट लागूऔषध गाँजा १७ किलो ६०० ग्रामसहित दुई जनालाई पक्राउ गरेको हो ।
पक्राउ पर्नेहरुमा पर्साको पर्सागढी नगरपालिका वडा नम्वर ८ बस्ने वर्ष ४६ को देवीलाल सहनी र सोही नगरपालिका वडा नम्वर १ बस्ने वर्ष ३२ को राम नारायण राम रहेको मकवानपुरका प्रहरी नायव उपरीक्षक श्यामु अर्यालले जानकारी दिए ।
उनीहरुलाई विशेष सूचनाको आधारमा पुगेको इलाका प्रहरी कार्यालय मनहरी मकवानपुरबाट खटिएको प्रहरी टोलीले पक्राउ गरेको हो ।
प्रहरी नायव उपरीक्षक अर्यालका अनुसार, बगरमा शंकाष्पद रुपमा झोला बोकी हिडिरहेका उनीहरुलाई रितपुर्वक चेकजाँच गरिएको थियो । सो क्रममा झोला भित्र लुकाई छिपाई गरी ल्याईएको अवस्थामा उक्त परिणामको गाँजा बरामद भएपछि निजहरुलाई पक्राउ गरिएको हो ।
पक्राउ परेका उनीहरुमाथि अनुसन्धान गर्न जिल्ला अदालत मकवानपुरबाट ७ दिनको म्याद थप गरिएको प्रहरी नायव उपरीक्षक अर्यालले बताए ।