मकवानपुरमा बसको ठक्करबाट दुई जना घाइते

मकवानपुर । मकवानपुरका बसको ठक्करबाट दुई जना घाइते भएका छन् । जिल्लाको मनहरी गाउँपालिका–८, भीआईपी चोकस्थित पुर्व–पश्चिम सडकखण्डमा बसले ठक्कर दिँदा मोटरसाइकलमा सवार दुई जना घाइते भएका हुन् ।

घाइते हुनेहरुमा मनहरी गाउँपालिका वडा नम्वर ७, पेन्चे बस्ने अन्दाजी वर्ष २७ को अमर थिङ र सोही ठाउँ बस्ने वर्ष २१ को नबिन तितुङ रहेको मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, दिउँसो साढे ३ बजेको समयमा चितवनबाट हेटौंडातर्फ आउँदै गरेको ना ५ ख ५३४४ नम्वरको बसले सोही दिशातर्फ आउँदै गरेको बा ९२ प ३०५७ नम्वरको मोटरसाइकलाई ठक्कर दिएको थियो ।

बसको ठक्करबाट मोटरसाइकल चालक अमर र सोही मोटरसाइकलमा पछाडी सवार नबिन घाइते भएका हुन् । घाइते दुबै जनाको अवस्थामा मध्यम रहेको र उनीहरुलाई उपचारको लागि मनहरी अस्पताल पठाइएको प्रहरी नायव उपरीक्षक अर्यालले बताए ।

बस, बस चालक र मोटरसाइकललाई प्रहरीले नियन्त्रणमा लिई घटनाको बारेमा आवश्यक अनुसन्धानका साथै कानूनी प्रकृया अगाडि बढाएको प्रहरी नायव उपरीक्षक अर्यालले बताए ।