हेटौंडादेखि पथलैयातर्फ जाँदै गरेको कारबाट अवैध गाँजा बरामद, दुई जना पक्राउ

बारा । हेटौंडाबाट पथलैयातर्फ जाँदै गरेको बिए २२ जे ५३३३ नम्बरको कारबाट प्रहरीले अवैध लागूऔषध गाँजासहित दुई जनालाई पक्राउ गरेको छ । प्रहरीले मंगलबार बिहान अवैध लागूऔषध गाँजा करिब १५ किलोग्रामसहित दुई जनालाई पक्राउ गरेको हो ।

पक्राउ पर्नेहरुमा भारत मोतिहारी ग्राम पंचायत राजमुरा–१४ चाग्डी गाउँ बस्ने २६ वर्षीय अखिलेख कुमार साह र १९ वर्षीय राज कुमार पासवान रहेका छन् । उनीहरुलाई इलाका प्रहरी कार्यालय अम्लेखगंजबाट खटिएको प्रहरीले पक्राउ गरेको हो ।

प्रहरीका अनुसार, उक्त कारलाई जितपुर सिमरा उपमहानगरपालिका–२१ स्थित सडकखण्डमा रोकी चेकजाँच गर्ने क्रममा कारको पछाडीको सिटमा फल्स बटम बनाई लुकाई छिपाई राखेको उक्त गाँजा फेला परेपछि निजहरुलाई पक्राउ गरिएको हो ।

पक्राउ परेकामध्ये अखिलेख कुमार कार चालक र राज कुमार कारमा सवार थिए । पक्राउ परेका उनीहरुमाथि प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।