हेटौंडाबाट लागूऔषधसहित दुई जना पक्राउ

मकवानपुर । मकवानपुर प्रहरीले लागूऔषधसहित हेटौंडा उपमहानगरपालिका वडा नम्वर १५, रातोमाटे चेकपोईन्टस्थित पुर्व-पश्चिम सडकखण्डबाट बुधबार दुई जनालाई पक्राउ गरेको छ ।

पक्राउ पर्नेहरुमा मकवानपुरको हेटौंडा–६ बस्ने २५ वर्षीय निश्चल विश्वकर्मा र बाराको जितपुर सिमरा महानगरपालिका–३ बस्ने १९ वर्षीय आर्यन अन्सारी रहेको मकवानपुरका प्रहरी निरीक्षक ठाकुर प्रसाद सापकोटाले जानकारी दिए ।

प्रहरी निरीक्षक सापकोटाका अनुसार, बुधबार साँझ साढे ५ बजेको समयमा सडकखण्डमा पथलैयाबाट हेटौंडातर्फ आउँदै गरेको ना ६१ प ७४९२ नं. को मोटरसाइकललाई रोकी चेकजाँच गरिएको थियो ।

सो क्रममा सय एमएलको लागूऔषध ओनेरेक्स ५ बोतल बरामद भएपछि मोटरसाइकल चालक विश्वकर्मा र पछाडी सवार अन्सारीलाई पक्राउ गरिएको हो ।

पक्राउ परेका उनीहरुलाई जिल्ला अदालत मकवानपुरबाट ५ दिनको म्याद थप गरि आवश्यक अनुसन्धान प्रकृया अगाडि बढाएको प्रहरी निरीक्षक सापकोटाले जानकारी दिए ।