रवि लामिछानेसहित ४४ जनाविरुद्ध मुद्दा दायर

कास्की । राष्ट्रिय स्वतन्त्र पार्टी (रास्वपा) सभापति रवि लामिछानेसहित ४४ जनाविरुद्ध आइतबार जिल्ला अदालत कास्कीमा मुद्दा दायर गरिएको छ ।

जिल्ला सरकारी वकिलको कार्यालय कास्कीले आइतबार दिउँसो पूर्व गृहमन्त्री समेत रहेका लामिछानेसहित ४४ जनाविरुद्ध अभियोगपत्र दर्ता गराएको हो ।

सरकारी वकिल कार्यालयकी सूचना अधिकारी शान्तिदेवी शर्माले ३१ व्यक्ति, आठ कम्पनी र जफत प्रयोजनका लागि पाँच व्यक्ति गरी ४४ जनाविरुद्ध अभियोगपत्र दायर गरेको जानकारी दिइन् ।

कास्की प्रहरीले गत सोमबार सरकारी वकिल कार्यालयलाई बुझाएको प्रतिवेदनमा ५१ जनालाई प्रतिवादी बनाउन सिफारिस गरिएको थियो ।

सूचना अधिकारी शर्माले कसुर अनुसार फरक–फरक मागदाबी लिइएको जानकारी दिइन् । सहकारी ठगी, सङ्गठित अपराध, सम्पत्ति शुद्धिकरणसहित राष्ट्र बैक ऐनविरुद्धको कसूरमा समेत अभियोगपत्र दायर गरिएको उनले बताइन् ।