मकवानपुरमा बोलेरो दुर्घटना: घाइते पुरुषको मृत्यु
तु खबर संवाददाता
मकवानपुर । मकवानपुरको राक्सिराङ गाउँपालिका वडा नम्वर ५, चाक्ले बगरस्थित भित्री सडकखण्डमा आज दिउँसो बोलेरो पिकअप गाडी दुर्घटनामा परेर गम्भीर घाइते भएका पुरुषको मृत्यु भएको छ ।
मृत्यु हुनेमा कैलाश गाउँपालिका वडा नम्वर ३ बस्ने वर्ष ५६ को शन्तबहादुर गोम्बा रहेको जिल्ला प्रहरी कार्यालय मकवानपुरले जनाएको छ ।
प्रहरीका अनुसार, दिउँसो मनहरीबाट कैलाश गाउँपालिकातर्फ जाँदै गरेको सु.प.प्र. ०१–००१ च २९४६ नं. को बोलेरो पिकअप गाडी ब्रेक फेल भई रोडबाट अन्दाजी ४ मिटर तल खसेर दुर्घटना हुँदा उनी गम्भीर घाइते भएका थिए ।
घाइते उनलाई तत्काल उद्दार गरी उपचारको लागि मनहरी अस्पतालतर्फ पठाइएको थियो । उनको सोही अस्पतालमा उपचारको क्रममा मृत्यु भएको जनाइएको छ ।
उक्त गाडीमा ८ जना सवार थिए । अन्य यात्रुहरु भने सबै सकुसल रहेका छन् । बलेरो घटनास्थलमा नै रहेको छ । गाडी चालक भने हाल सम्पर्कमा नरहेको भन्दै प्रहरीले उनको खोजतलास गर्नुका साथै घटनाको बारेमा आवश्यक अनुसन्धान गरिरहेको छ ।
मृतक गोम्बाको शव हेटौंडा अस्पतालको शव गृहमा ल्याइएको छ ।
