दुई सुमो चालक मकवानपुर प्रहरीको नियन्त्रणमा

मकवानपुर । मकवानपुर प्रहरीले दुई सुमो चालकलाई नियन्त्रणमा लिएको छ । प्रहरीले हेटौंडा–भैंसे सडकखण्ड अन्तरगत भीमफेदी गाउँपालिका–१ बागझोराबाट दुई जनालाई नियन्त्रणमा लिएको हो ।

प्रहरीले उक्त स्थानमा सवारी चालकमाथि विशेष चेकजाँच गरिरहेको छ । सो क्रममा जिल्ला प्रहरी कार्यालय मकवानपुरले लागूपदार्थ तथा मादक पदार्थ सेवन गरी सुमो चलाउने दुई चालकलाई नियन्त्रणमा लिएको मकवानपुरका प्रहरी प्रवक्ता एवम् प्रहरी नायव उपरीक्षक श्यामु अर्यालले जानकारी दिए ।

आइतबार सवारी दुर्घटना र क्षति न्यूनीकरण गर्ने उद्देश्यले जिल्ला प्रहरी कार्यालय मकवानपुरबाट प्रहरी नायव उपरीक्षक अर्यालको कमाण्डमा खटिएको टोलीले बागझोरामा विशेष चेकजाँच गरेको हो ।

जिल्ला ट्राफिक प्रहरी कार्यालय मकवानपुर र जिल्ला जनस्वास्थ्य कार्यालय मकवानपुर हेटौंडाको प्राबिधिक सहयोगमा खटिएको उक्त टोलीले ५२ जना चालकलाई रोकी मापसे तथा लापसे जाँच गरेको छ ।

प्रहरीको नियन्त्रणमा हुनेहरुमा क्रमशः सर्लाहीबाट काठमाडौं जाँदै गरेको ना १ ज ४६१९ नम्बरको सुमो चालक सर्लाहीको बरथवा नगरपालिका–८ बस्ने ३२ वर्षीय फेसम खड्का र काठमाडौंबाट हेटौंडातर्फ आउदैै गरेको ना १ ज ७०२८ नम्बरको सुमो चालक हेटौंडा–८ बस्ने ३६ वर्षीय धश्रीसुजन गुरुङ रहेका छन् ।

प्रहरीको नियन्त्रणमा रहेका दुबै चालकहरुमाथि आवश्यक अनुसन्धान प्रकृया अगाडि बढाइएको र चेकजाँच कार्य निरन्तर जारी रहने प्रहरी नायव उपरीक्षक अर्यालले बताए ।