मकवानपुरमा भिरबाट लडेर दुई जना घाइते

मकवानपुर । मकवानपुरमा भिरबाट लडेर दुई जना घाइते भएका छन् । जिल्लाको भीमफेदी गाउँपालिकामा भिरबाट लडेर दुई जना घाइते भएको बागमती प्रदेश प्रहरी कार्यालय, हेटौँडाले जनाएको छ ।

प्रहरीका अनुसार, घाइते हुनेहरुमा भीमफेदी गाउँपालिका ९ स्थित साल बिसाउनेका सुनिल गोले र प्रशान्त गोले रहेका छन् । बिहीबार १३ वर्षीय सुनिल घरदेखि छ–सात कि.मि. पश्चिमतर्फरहेको देउराली सामुदायिक वनको एकपाखे भिरमा घाँस काट्न गएका थिए ।

सो क्रममा सुनिल लडेपछि निजलाई बचाउने क्रममा सँगै गएको साथी १८ वर्षीय प्रशान्तसमेत लड्दा घाइते भएको बुझाइएको छ ।

घाइते दुबै जनाको हेटौंडा अस्पतालमा सामान्य उपचारपश्चात थप उपचारका लागि चितवन पुरानो मेडिकल कलेज भरतपुरमा लगिएको छ । घाइते सुनिल गोलेको टाउको, अनुहार र कम्मर, खुट्टामा भित्री चोट तथा प्रशान्तको बायाँ हातखुट्टा, कम्मर, छातीमा भित्री चोट लागेको प्रहरीले जनाएको छ ।