मकवानपुरमा सडेको अवस्थामा वृद्धको शव फेला

मकवानपुर । मकवानपुरमा सडेको अवस्थामा एक वृद्धको शव फेला परेको छ । जिल्लाको भीमफेदी गाउँपालिका –२, रिठेडाँडामा सोमबार सडेगलेको अवस्थामा वृद्धको शव फेला परेको प्रहरीले जनाएको छ ।

उक्त शव जिल्लाको कैलाश गाउँपालिका–७, भार्ताका ७० वर्षीय टिकाराम प्रजाको रहेको जिल्ला प्रहरी कार्यालय मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, उनको शव सोमबार साढे ११ बजेको समयमा भेटिएको हो । घटनास्थलमा पुगेर प्रहरीको अनुसन्धान टोलीले अनुसन्धान गरिरहेको छ ।

गत कात्तिक १४ गते भीमफेदी–९ मा भान्जी पम्फा चेपाङको घर जाने क्रममा प्रजा बेपत्ता भएका थिए । टिकरामका भान्जा रामहरि प्रजाले मङ्सिर ४ गते जिल्ला प्रहरी कार्यालय मकवानपुरमा मामाको खोजी गरिदिन निवेदन पनि दर्ता गराएका थिए ।

मृतकले लगाएको कपडा र साथमा रहेको झोलाको आधारमा सनाखत गरेको प्रहरीले नायव उपरीक्षक अर्यालले बताए । उनको शव पोष्टमार्टमका लागि हेटौंडा अस्पतालमा राखिइएको छ ।