१११ किलो गाँजासहित हेटौंडाबाट एक जना पक्राउ

मकवानपुर । मकवानपुर प्रहरीले अवैध लागूऔषध गाँजासहित हेटौंडाबाट एक जनालाई पक्राउ गरेको छ । प्रहरीले पूर्व–पश्चिम सडकखण्ड अन्तरगत पर्ने मकवानपुरको हेटौंडा उपमहानगरपालिका वडा नम्वर १५, रातोमाटे चेकपोइन्टस्थित सडकखण्डबाट १ सय ११ किलो लागूऔषध गाँजासहित माघ १ गते मंगलबार एक जनालाई पक्राउ गरेको हो ।

पक्राउ पर्नेमा मकवानपुरको कैलाश गाउँपालिका वडा नम्वर २, डाँडाखर्क बस्ने वर्ष ३४ को रावल स्याङ्वो रहेको जिल्ला प्रहरी कार्यालय मकवानपुरका प्रहरी नायव उपरीक्षक श्यामु अर्यालले जानकारी दिए । उनलाई प्रहरी चौकी रातोमाटे मकवानपुरबाट खटिएको प्रहरी टोलीले पक्राउ गरेको प्रहरी नायव उपरीक्षक अर्यालले बताए ।

प्रहरी नायव उपरीक्षक अर्यालका अनुसार, हेटौंडाबाट निजगढतर्फ जाँदै गरेको बा ७ च २५१० नं. को पिकअप गाडी र सो गाडीका चालक स्याङ्वोलाई शंका लागि चेकजाँच गरिएको थियो । सो क्रममा गाडीको पछाडीको ढाला भित्र खाली क्रेटहरुले छोपी लुकाईछिपाई गरी ल्याईएको अवस्थामा उक्त परिणामको गाँजा बरामद भएपछि निजलाई पक्राउ गरिएको हो ।

पक्राउ परेका उनीमाथि आवश्यक अनुसन्धानका साथै कानूनी प्रकृया अगाडि बढाएको प्रहरी नायव उपरीक्षक अर्यालले बताए ।