मकवानपुर प्रहरीद्वारा दुई सय १२ किलो गाँजा र गाडी नियन्त्रण

हेटौंडा । मकवानपुर प्रहरीले जिल्लाको राक्सिराङ गाउँपालिका वडा नम्वर ५, चैनपुरबाट दुई सय १२ किलो गाँजा र पिकअप गाडी नियन्त्रणमा लिएको छ ।

कैलाश गाउँपालिकाबाट मनहरीतर्फ आउँदै गरेको बा १० च ७७५८ नम्बरको बोलेरो पिक गाडी प्रहरीलाई देख्नासाथ गाडी चालक तथा अर्का १ जना व्यक्तीहरु सडकमा गाडी छोडी भागी फरार भएको मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरीले तत्कालै स्थानीय मानिसहरुको रोहवरमा खानतलासी गर्दा उक्त गाडीको पछाडी ढालाको भागमा लुकाई छिपाई गरी ल्याईएको अवस्थामा उक्त परिणामको गाँजा बरामद भएपछि गाडीसहित नियन्त्रणमा लिएको प्रहरी नायव उपरीक्षक अर्यालले बताए ।

प्रहरीले फरार व्यक्तिहरुको खोजीकार्य गर्नुका साथै घटनाको बारेमा आवश्यक अनुसन्धान गरिरहेको छ ।