बालबालिकालाई न्यानो कपडा वितरण
तु खबर संवाददाता
हेटौंडा । डिभाइन युथ क्लब नेपाल हेटौंडा तथा जगत्गुरुत्तम मन्दिर अध्यात्म केन्द्रले मकवानपुरको बागमती गाउँपालिका– ३ स्थित तीन वटा सामुदायिक विद्यालयमा अध्ययनरत बालबालिकाहरुलाई न्यानो कपडा तथा शैक्षिक सामग्री वितरण गरेको छ ।
आर्थिक अवस्था कमजोर भएका ६६ जना बालबालिकाहरुलाई मंगलबार न्यानो कपडा तथा शैक्षिक सामग्री उपलब्ध गराइएको क्लब हेटौंडाका संयोजक विवेक सुवेदीले जानकारी दिए ।
बागमती ३ गढनसिरस्थित श्री फुलमन्दिर आधारभुत विद्यालयका ११ जना, श्री जनश्रम आधारभुत विद्यालयका २३ जना र श्री जनप्रभात आधारभुत विद्यालयका ३२ जना बालबालिकालाई सहयोग गरिएको हो ।
कार्यक्रममा बागमती गाँउपालिकाका प्रवक्ता तथा ३ नम्वर वडा अध्यक्ष कमान सिं पाख्रिनले मानव कल्याणको दृष्टिकोणबाट सो कार्यक्रम अत्यन्तै महत्वपूर्ण भएको बताए । सामाजिक सेवाको भावना बोकेर आउने विभिन्न संघ संस्थासँग सहयोग समन्वय गर्न बागमती गाउँपालिका तयार रहेको समेत उनले बताए ।
