सहिद दिवसको अवसरमा रक्तदान कार्यक्रम

मकवानपुर । हेटौंडा उपमहानगरपालिका वडा नम्वर ११ स्थित सहिद स्मारक परसरमा आज (आइतबार) रक्तदान कार्यक्रमको आयोजना गरिएको छ ।

सहिद स्मारक विकास समितिद्वारा आयोजित सप्ताहव्यापी कार्यक्रमअन्तर्गत आज तेस्रो दिन रक्तदान कार्यक्रमको आयोजना गरिएको हो ।
नेपाल रेडक्रस सोसाइटी हेटौंडा–११ शाखाको व्यवस्थापनमा भएको सो कार्यक्रममा १४ जनाले रक्तदान गरेको समितिका सचिव रघुनाथ खुलालले जानकारी दिए ।

समितिले सप्ताहव्यापी कार्यक्रमअन्तर्गत माघ १४ गते बिहान साढे ७ गते लखन वाटीका व्यवस्थापन समितिको व्यवस्थापनमा प्रथम सहिद लखन थापा वाटीका हेटौंडा–१२ मा श्रद्धाञ्जली कार्यक्रमको आयोजना गर्ने सचिव खुलालले बताए ।

यस्तै, माघ १५ गते मदन भण्डारी फाउण्डेशनको व्यवस्थापनमा “लोकतन्त्र प्राप्तीका लागि राजनितिक दलको भूमिका विषयक वक्तृत्वकला प्रतियोगिताको आयोजना, नगर स्तरीय बाल क्लब सहभागी र शिक्षक दौड प्रतियोगिता, शिक्षक संगठनको व्यवस्थापनमा महिला शिक्षकको स्लो स्कुटर प्रतियोगिता र बागमती प्रदेश सरकारको समन्वयमा माघ १६ गते बिहान साढे ७ बजे प्रभातफेरी, सहिद प्रति सलामी (नेपाल प्रहरी, नेपाली सेना), पुष्पार्पण श्रद्धान्जली सभा र सम्मान कार्यक्रमको आयोजना गरी सप्ताहव्यापी कार्यक्रमको समापन गरिने सचिव खुलालले बताए ।

समितिले माघ १० गते राष्ट्रिय झण्डा झण्डोत्तोलन गरी सप्ताहव्यापी कार्यक्रमको शुभारम्भ गरेको थियो भने माघ ११ गते शुक्रबार पत्रकार भेटघाट तथा बधाई कार्यक्रम र हिजो माघ १२ गते शनिबार विशेष सरसफाई कार्यक्रमको आयोजना गरेको गरेको थियो ।

उक्त समितिले हरेक वर्ष माघ १० गतेदेखि १६ गतेसम्म सहिदहरुको सम्झनामा विविध कार्यक्रमको आयोजना गर्दै आएको छ ।