अर्थहीन वार्तामा शिक्षक महासंघ नजाने

काठमाडौ । शिक्षक महासंघले यथास्थितिमा सरकारले बोलाएको वार्तामा नजाने बताएको छ । बिहीबार कार्यवाहक प्रधानमन्त्री प्रकाशमान सिंहको अध्यक्षतामा बसेको बैठकले शुक्रबार वार्तामा आउन शिक्षक महासंघलाई आग्रह गरेको थियो ।

शुक्रबार सरकारी टोलीले वार्ताका लागि शिक्षक प्रतिनिधिहरुलाई कुरेर बसेको भएपछि शिक्षक प्रतिनिधि वार्तामा गएनन् । प्रतिनिधि नगएपछि पुनः सरकारले वार्तामा बोलाए पनि शिक्षकहरु नजाने भएका छन् ।

समाधान नदिने वार्तामा जानुको अर्थ नभएको भन्दै शिक्षकहरु वार्तामा नगएका हुन् । ऐन जारी हुनुपर्ने आफूहरुको माग रहेको बताउँदै शिक्षकहरुले सदन बोलाएर ऐन जारी गर्न माग गरेको छ ।

ऐन बन्ने सन्दर्भमा २०८० असोज ५ मा सहमति भइसकेकाले फेरि वार्ताको औचित्य नरहेको महासंघको धारणा रहेको छ । सहमति कार्यान्वयन नभएको भन्दै विगत २ महिनादेखि महासंघले चरणबद्ध आन्दोलन गर्दै आएको छ । शिक्षकहरु २० चैतदेखि काठमाडौमा छन् । उनीहरु विरोध प्रदर्शन गरिरहेका छन् ।