चुनढुंगा लोड गरी हेटौंडातर्फ आउँदै गरेको टिपर दुर्घटना, हेटौंडाका मोक्तानसहित तीन घाइते

मकवानपुर । मकवानपुरको भीमफेदीमा टिपर दुर्घटना हुँदा तीन जना घाइते भएका छन् । गएराति भीमफेदी गाउँपलिका वडा नम्बर ६ स्थित रिद्धिसिद्धिको खानीबाट चुनढुंगा लोड गरी हेटौंडातर्फ आउँदै गरेको बा ३ ख ६९२७ नम्बरको टिपर दुर्घटना हुँदा तीन जना घाइते भएको जिल्ला प्रहरी कार्यालय मकवानपुरले जनाएको छ ।

घाइते हुनेहरुमा मकवानपुरको हेटौंडा उपमहानगरपालिका वडा नम्बर १५ निवासी २३ वर्षीय मिलन मोक्तान, भीमफेदी गाउँपालिका वडा नम्बर ५ बस्ने २१ वर्षीय रमेश भोलन र सोही ठाउँ बस्ने २३ वर्षीय अनुभव मोक्तान रहेका छन् ।

जिल्ला प्रहरी कार्यालय मकवानपुरका प्रवक्ता इन्द्रबहादुर रानाका अनुसार, सो दुर्घटनामा परी घाइते भएका मध्ये हेटौंडाका मोक्तान गम्भीर घाइते भएका छन् । उनीहरु सबैजनाको भीमफेदी स्वास्थ्य केन्द्रमा सामान्य उपचारपश्चात हेटौंडा–११ थानाभर्याङस्थित चुरेहिल अस्पतालमा उपचार भइरहेको छ ।

घाइते तीनै जना मजदुर हुन् । उक्त टिपर सडकदेखि करिब ३० मिटर तल खसेको थियो । घटनाको विषयमा आवश्यक अनुसन्धान भइरहेको मकवानपुर प्रहरीले जनाएको छ ।