बारामा तस्कर र प्रहरीबीच गोली हानाहान, हेटौंडाका तामाङ पक्राउ

बारा । बारामा गाँजा तस्करको समूह र प्रहरीबीच गोली हानाहान भएको छ । गएराति इलाका प्रहरी कार्यालय निजगढ र अस्थायी प्रहरी पोष्ट रतनपुरबाट खटिएको संयुक्त प्रहरीमाथि तस्करहरुको समूहले निजगढ नगरपालिका वडा नम्बर १३ स्थित भक्तलाल खोलाको बगरमा गोली फायर गरेको थियो ।

प्रतिकार स्वरुप प्रहरी टोलीले पनि ५ राउण्ड गोली फायर गरेकोमा सो क्रममा प्रहरीले बन्दुकसहित हेटौंडाका एक जनालाई पक्राउ गरेको छ । पक्राउ पर्नेमा मकवानपुर जिल्लाको हेटौंडा उपमहानगरपालिका वडा नम्बर ६ बस्ने ४७ वर्षीय ईमान सिंह तामाङ रहेका छन् ।

प्रहरीले घटनास्थलबाट १०२ किलो अवैध लागूऔषध गाँजा र तामाङको साथबाट लोड भएको १ थान भरुवा बन्दुक बरामद गरेको जनाएको छ ।

पक्राउ पररेका तामाङमाथि आवश्यक अनुसन्धानका साथै कानूनी कारबाही अगाडि बढाइरहेको प्रहरीले जनाएको छ ।