अबैध हतियार र गोलीसहित एक जना पक्राउ

बारा । बारा प्रहरीले अवैध हतियार र गोलीसहित एक जनालाई पक्राउ गरेको छ । पक्राउ पर्नेमा महोत्तरीको साविक डाम्ही मडई गाविस वडा नं. २ हाल परिवर्तित महोत्तरी गाउँपालिका–२ बस्ने अन्दाजी ४० वर्षीय प्रमोदकुमार चौधरी भूमिहार रहेका छन् ।

शुक्रबार बाराको जितपुरसिमरा उपमहानगरपालिका वडा नम्बर ७ शान्ति टोलस्थित बाटो छेउमा रहेको गजेन्द्र ठाकुरको सैलुन (कपाल काट्ने पसल) मा शंकास्पद रूपमा बसिरहेको उनलाई इलाका प्रहरी कार्यालय सिमरा र जितपुर बाराबाट खटिएको संयुक्त प्रहरी टोलीले पक्राउ गरेको हो ।

प्रहरीका अनुसार, पक्राउ परेका उनको साथबाट कटुवा पेस्तोल एक थान, २ राउण्ड गोली र १ वटा मोबाईल बरामद गरेको छ ।

पक्राउ परेका उनीमाथि आवश्यक अनुसन्धानका साथै कानूनी कारबाही अगाडि बढाएको प्रहरीले जनाएको छ ।