३ जना मृत फेला, स्काभेटर दुर्घटनामा १ जनाको मृत्यू

काठमाडौँ, २० कात्तिक । मुलुकका फरक स्थानहरुमा ३ जना मृत अवस्थामा फेला परेका छन् । त्यस्तै स्काभेटर दुर्घटनामा एक जनाको ज्यान गएको छ ।
रुपन्देहीको सिद्धार्थ नगरपालिका–१ बेलहिया बस्ने ४७ बर्षीय सुदेश राना मगर सोमबार नागपथ चोकदेखि भित्र पट्टि पानी जमेको खेतमा मृत अवस्था फेला परेका छन् । यसैगरी रुपन्देही बुटवल उपमहानगरपालिका–६ वि.पि.चोकमा सोमबार नाम,थर,वतन खुल्न नसकेका अंदाजी ६० बर्षीय पुरुष व्यक्ति मृत अवस्थामा फेला परेका छन् ।
धनुषाको गणेशमान चारनाथ नगरपालिका–४ स्थित बनमारा घारीमा सोमबार नाम,थर,वतन खुल्न नसकेको अंदाजी ४५ बर्षीय पुरुष व्यक्ति मृत अवस्थामा फेला परेका छन् । यस सम्बन्धमा स्थानीय प्रहरीले आवश्यक अनुसन्धान गरिरहेको प्रहरी प्रधान कार्यालय नक्सालले जनाएको छ ।
धादिङको खनियावास गाउँपालिका– ५ सत्यदेवी स्थित ग्रामिण सडक खण्ड मर्मत गर्ने क्रममा सोमबार २२०–एलसि–७ नम्वरको स्काभेटरको चक्का भासिन गई सडकबाट अंदाजी ३० मिटर तल खसेर दुर्घटना हुंदा स्काईभेटर चालकको मृत्यू भएको छ । प्रहरीका अनुसार नुवाकोट बिदुर नगरपालिका–११ बस्ने ४० बर्षीय कृष्ण तामाङको घटनास्थलमै मृत्यु भएको हो ।
उपचारको क्रममा कैदीको मृत्यू
त्यस्तै जिल्ला कारागार मोरङ बिराटनगरमा गत २०७३ माघ १० गते देखी लागूऔषध मुद्धाको थुनुवामा रहेका एक व्यक्तिको ज्यान गएको छ । श्वास प्रश्वास सम्बन्धी बिरामी भएका धनकुटा खोकु–५ घर भएका ३९ बर्षीय हरीकुमार राईको कोशी अंचल अस्पताल बिराटनगरमा उपचारको क्रममा सोमबार मृत्यु भएको हो ।