३५ हजार अमेरिकी डलर सहित मकवानपुरमा १ जना पक्राउ

मकवानपुर, ३० कात्तिक । ३५ हजार अमेरिकी डलर सहित मकवानपुर प्रहरीले एक जनालाई पक्राउ गरेको छ । बिहीबार बिहान करिब पौने ६ बजेको समयमा ईलाका प्रहरी कार्यालय पशुपतिनगर, मकवानपुरबाट खटिएको प्रहरी टोलीले उक्त रकमसहित भारतको ग्राम भेडीहारी पोष्ट सिरिसिया भेडीहारी पुर्वी चम्पारण विहार बस्ने वर्ष २५ को शेषनाथ प्रसादलाई पक्राउ गरेको हो ।
हेटौडा उपमहानगरपालिका वडा नम्बर १५ रातोमाटे स्थित प्रहरी चेकपोष्टमा काठमाण्डौबाट हेटौडा हुँदै बिरगंजतर्फ जाँदै गरेको ना ६ ख ६२९१ नम्बरको यात्रुबाहक बस रोकी जाँच गर्ने क्रममा उक्त बसमा यात्रा गरी आएका प्रसादलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
जाँचका क्रममा प्रसादले लगाएको जुत्ता भित्र लुकाई छिपाई विभिन्न नम्बरको अमेरीकी डलर फेला परेको थियो । उनलाई पक्राउ गरी आवश्यक कारवाहीको लागी राजश्व अनुसन्धान विभाग, हरिहर भबन ललितपुर काठमाण्डौमा बुझाउने तयारी भइरहेको प्रहरीले जनाएको छ ।