बेलायतले कोरोना सम्बन्धी सबै प्रतिबन्ध हटायोः कोरोना परीक्षण नहुने, खोप लगाउनु नपर्ने

काठमाडौँ । बेलायतले कोरोना सम्बन्धी सबै प्रतिवन्धको हटाउने भएको छ । बेलायतमा फेबु्रअरी २४ तारिखबाट कोरोना सम्बन्धी बाँकी रहेका सबै प्रतिबन्धहरुको अन्त्य हुने भएको बेलायती प्रधानमन्त्री बोरिस जोन्सनले सोमबार पत्रकार सम्मेलनमार्फत् जानकारी गराएका छन् । आउँदो बिहीबारदेखि कोरोना संक्रमित भएपनि आइसोलेशन बस्न पर्ने कानूनी बाध्यता रहने छैन । यद्यपि कोरोना पोजिटिभ भएमा घरमै बस्न सुझाव दिइए पनि यसलाई बाध्यात्मक रुपमा भने लागू गरिने छैन । सोही दिनबाट कन्ट्याक्ट ट्रेसिंङ सम्बन्धी व्यवस्थाको पनि अन्त्य गरिनेछ ।

यसैगरी हाल लागू गरिएको भ्याक्सिन पासपोर्ट पनि खारेज हुने भएको छ । हाल निशुल्क रुपमा उपलब्ध गराउँदै आएको कोरोना परीक्षणको व्यवस्था पनि हटाइने भएको छ । तर, जोखिममा रहेका ८० वर्ष माथि उमेर भएका र केयर होममा रहेका मानिसको हकमा उक्त नियम यथावत नै रहने जनाइएको छ । होम आइसोलेशन बसेवापत निम्न आय भएकालाई सरकारले उपलब्ध गराउँदै आएको पाँच सय पाउण्ड पनि हटाइने भएको छ । आउँदो बुधबार बेलायतको संसदमा मतदान गरिने र संसदले पारित गरेपछि बिहीबारबाट कोभिड सम्बन्धी नयाँ नियम कार्यान्वयन हुनेछ ।

ओमिक्रोनको पिक समय सकिएकाले सर्वसाधारणले आफैले आफ्नो जिम्मेवारी बहन गर्न प्रधानमन्त्रीले आग्रह गरेका छन् । महामारीको अन्त भएको छैन, भाइरस अझै कायमै रहेकाले आफ्नो सुरक्षा आफैले सावधानीपूर्वक गर्न पनि उनको अनुरोध छ । राष्ट्रिय तथ्यांकको कार्यालयका अनुसार गतहप्ताको आंकडाका आधारमा अझै पनि बेलायतमा २० जनामध्ये एक जनामा कोभिड संक्रमण हुने गरेको बताएको छ ।