मकवानपुर थाहा नगरका २ जना काठमाडौँमा पक्राउ

काठमाडौं, ५ पुस । मकवानपुरको थाहा नगरपालिका–१ घर भई काठमाडौं चन्द्रागिरी नगरपालिका–११ गुर्जुधारा डेरा गरी बस्ने २६ वर्षीय सुर्यबहादुर थिङलाई प्रहरीले पक्राउ गरेको छ ।

उनलाई ३ के.जि.५ सय ग्राम गाँजाको धुलो सहित प्रहरीले पक्राउ गरेको प्रहरी प्रधान कार्यालय नक्सालले जनाएको छ । शंकास्पद रुपमा बाटोमा हिँडीरहेका थिङलाई मंगलबार जाँच गर्ने क्रममा उनले बोकेको झोलाबाट उक्त गाँजाको धुलो बरामद भएको थियो ।

त्यस्तै काठमाडौँको चन्द्रागिरी नगरपालिका–११ बालकुमारीबाट मकवानपुरको थाहा नगरपालिका पालुङ घर भई हाल काठमाडौं नैकाप बस्ने ३४ वर्षीया शुशिला तामाङलाई प्रहरीले मंगलबार २ के.जि.६ सय ग्राम लागूऔषध चरेश सहित पक्राउ गरेको छ । यस सम्बन्धमा प्रहरीले थप अनुसन्धान गरिरहेको प्रहरी प्रधान कार्यालय नक्सालले जनाएको छ ।