प्रगति माविको नवनिर्मित भवन हस्तान्तरण

मकवानपु । हेटौंडा उपमहानगरपालिका वडा नम्वर ९ स्थित प्रगति माध्यमिक विद्यालयको नवनिर्मित भवन आज हस्तान्तरण गरिएको छ । शिक्षा विकास तथा समन्वय इकाई मकवानपुरमा प्रमुख दीनानाथ गौतमले आज विद्यालय व्यवस्थापन समितिका अध्यक्ष प्रदीप पराजुलीलाई भवनको सम्पन्न प्रमाणपत्र हस्तान्तरण गरेका हुन् ।

उक्त भवन जापानी सहयोग नियोग जाइकाको आर्थिक लगानीमा शर्मा ए एम जेभी निर्माण कम्पनीले एक करोड ४७ लाखको लागतमा ६ कोठाको तीन तले भवन निर्माण गरेको हो । कार्यक्रमका प्रमुख अतिथि गौतमले निर्धारित समयभन्दा अघि नै निर्माण सम्पन्न गरेकोमा निर्माण व्यवसायी कम्पनीलाई धन्यवाद दिए ।

उनले मकवानपुरका विद्यालयहरू भौतिक रूपले सम्पन्न भएकाले अब शैक्षिक गुणस्तर वृद्धिमा ध्यान दिन आवश्यक रहेको उल्लेख गरे । उनले प्रगति माविका लागि आवश्यक परेको हरेक सहयोग गर्न आफू तयार रहेको बताए । उनले विद्यालय व्यवस्थापन समितिका अध्यक्ष प्रदीप पराजुली हरेक समय विद्यालयकै काममा सक्रिय रहेको भन्दै प्रशंसा गरे ।

विद्यालय व्यवस्थापन समितिका अध्यक्ष प्रदीप पराजुलीले विद्यालयका लागि अझै भवन अपुग रहेकाले थप भवन निर्माणका लागि पहल गरिदिन प्रमुख गौतमसँग अनुरोध गरे ।