हेटौंडाका स्याङ्तान र मोक्तान प्रहरीको फन्दामा

बारा । बाराको जितपुरसिमरा उपमहानगरपालिका–१ पथलैया तिनकुने चोकबाट प्रहरीले अवैध लागूऔषध गाँजासहित दुई जनालाई पक्राउ गरेको छ । प्रहरीले ३२ किलोग्राम लागूऔषध गाँजासहित दुई जनालाई बिहीबार बिहान पक्राउ गरेको हो ।

पक्राउ पर्नेहरुमा मकवानपुरको हेटौंडा उपमहानगरपालिका वडा नम्वर १९ बस्तीपुर बस्ने ४१ वर्षीय हिरालाल स्याङ्तान र ३५ वर्षीया लक्ष्मी मोक्तान रहेको जिल्ला प्रहरी कार्यालय बाराले जनाएको छ ।

प्रहरीका अनुसार, हेटौंडाबाट सिमरातर्फ जाँदै गरेको ना १ ह ५८९३ नम्वरको अटोलाई प्रहरी चौकी पथलैयाबाट खटिएको प्रहरीले जाँच गर्ने क्रममा अटो चालक हिरालाल र अटोमा सवार लक्ष्मीको साथबाट उक्त परिमाणको गाँजा बरामद भएपछि उनीहरुलाई पक्राउ गरिएको हो ।

पक्राउ परेका उनीमाथि आवश्यक अनुसन्धानका साथै कानूनी प्रकृया अगाडि बढाइएको जनाइएको छ ।