सङ्खुवासभामा बाढीः एक जनाको मृत्यु, १६ बेपत्ता

काठमाडौँ । सङ्खुवासभामा बाढीले बगाएर एक जनाको मृत्यु भएको छ भने १६ जना बेपत्ता भएका छन् ।

मृत्यु हुनेको सनाखत भइनसकेको प्रहरीले जनाएको छ । जिल्लाको पाँचखपन नगरपालिका ५ मा बाढीले बगाएर ल्याएको अवस्थामा शव फेला परेको प्रहरीले जनाएको छ ।
चैनपुर–४ पेङ्कोट र पाँचखपन–९ मा गएको पहिरोले खोला थुनिएको थियो । थुनिएको खोला एक्कासि खुलेर आएको बाढीले आसपासको क्षेत्रमा धेरै क्षति गरेको हुनसक्ने प्रहरीले जनाएको छ ।

बाढीले चैनपुर ४ मा निर्माणाधीन सुपर हेँवा हाइड्रोमा क्षति पुर्याएको छ । उक्त परियोजनामा काम गर्ने १६ मजदुरहरू सम्पर्कविहीन रहेको जनाइएको छ । सम्पर्क विहीन भएकाहरूको अवस्थाबारे कुनै जानकारी नभएको प्रहरीले जनाएको छ ।

गए रातिदेखि नै कोशी प्रदेशका विभिन्न जिल्लामा भारी वर्षा भइरहेको छ । गए राति नै ताप्लेजुङमा गएको पहिरोमा परी ४ जना बेपत्ता रहेका छन् ।