वडा कार्यालयलाई सेनेटरी प्याड भेन्डिङ मेसिन सहयोग

मकवानपुर । मकवानपुरको हेटौंडा उपमहानगरपालिका १६ नम्वर वडा कार्यालयलाई सेनेटरी प्याड भेन्डिङ मेसिन सहयोग गरिएको छ । वडा कार्यालयलाई सहयोगी मन नेपालले उक्त सेनेटरी प्याड भेन्डिङ मेसिन सहयोग गरेको हो ।

आइतबार सहयोगी मनका अध्यक्ष केदारप्रसाद चौलागाईंले हेटौंडा–१६ का वडाध्यक्ष रामकृष्ण कोइरालालाई उक्त मेसिन हस्तान्तरण गरेका हुन् ।

वडाध्यक्ष कोइरालाले सहयोगी मनबाट सेनेटरी प्याड भेन्डिङ मेसिन सहयोग प्राप्त भएकोमा खुसी व्यक्त गर्दै महिनावारी भएको समयमा वडा कार्यालय सेवा लिन आएका दिदीबहिनीहरुलाई सो मेसिनबाट सेनेटरी प्याड लिन सहज हुने बताए ।

वडा कार्यालयमा विभिन्न तालिम, गोष्ठि तथा कार्यक्रमहरु हुँदा महिला दिदीबहिनीहरुको सहभागीता हुँदा महिनावारीको समयमा समस्या भोग्न नपरोस् भन्ने उद्देश्यले उक्त मेसिन सहयोग गरिएको सहयोगी मनका अध्यक्ष्य चौलागाईंले बताए ।

सहयोगी मनले यसअघि पनि विभिन्न संघ, संस्था तथा परिवारहरुको लागि सहयोग गर्दै आएको छ ।