टेलिफोनमार्फत जिस्क्याएको निहुँमा कुटपिट, एक जनाको मृत्यु

पर्सा । पर्सामा १६ वर्षीया किशोरीलाई १७ वर्षीय किशोरले टेलिफोनमार्फत जिस्क्याएको निहुँलाई लिएर कुटपिट गर्दा एक जनाको मृत्यु भएको छ । मृत्यु हुनेमा जिल्लाको पर्सागढी नगरपालिका–४ वारवाटाडी बस्ने २१ वर्षीय जमुदिन महमद अंसारी रहेका छन् ।

उक्त कुटपिट तथा झै–झगडामा संलग्न रहेको अभियोगमा प्रहरीले सोही ठाउँ बस्ने २४ वर्षीय अबतुल्लाह मिया अंसारी र ४५ वर्षीय वकिल महमद अंसारीलाई नियन्त्रणमा लिएको छ ।

उक्त विषयमा वकिल महमद अंसारी र अली महमद अंसारीबीच शनिबार राति झै–झगडा तथा कुटपिट भएको अवस्थामा अबतुल्लाह मिया अंसारीले चिर्पटले प्रहार गर्दा गम्भीर घाइते भएका थिए ।

चिर्पट प्रहारबाट गम्भीर घाइते भएका जमुदिनको नारायणी अस्पताल वीरगंज हुँदै एलएस न्युरो अस्पताल बारामा थप उपचारको क्रममा बुधबार बिहान मृत्यु भएको हो । उक्त घटनाको बारेमा प्रहरीले आवश्यक अनुसन्धान गरिरहेको जनाइएको छ ।