नगर प्रमुख लामाद्वारा वडा कार्यालयको उद्घाटन

मकवानपुर । हेटौंडा उपमहानगरपालिकाको प्रमुख मीना कुमारी लामाले बिहीबार हेटौंडा–१२ को वडा कार्यालय भवनको उद्घाटन गरेकी छन् ।

नगर प्रमुख लामाले हेटौंडा–१२ पदमपोखरीस्थित हात्तीगैंडामा निर्माण भएको वडा कार्यालयको नवनिर्मित भवनको उद्घाटन गरेकी हुन् ।

७० लाख रुपैयाँ लागतमा निर्माण भएको उक्त भवनको पहिलो तल्लामा ४ कोठा रहेको छ भने दोस्रो तल्लामा एउटा कोठा र एउटा सभाकक्ष रहेको वडा सचिव रामलाल थिङले जानकारी दिए ।

२०७९ साल फागुन महिनामै निर्माण सम्पन्न भए पनि विद्युत जडान गर्न ढिलाई भएका कारण कार्यालय सार्न ढिलो भएको वडा सचिवले बताए ।

वडा कार्यालय उद्घाटन कार्यक्रममा कार्यवाहक वडाध्यक्ष ज्ञानबहादुर श्रेष्ठ, नगर कार्यपालिका सदस्य रुक्मिणी गोङ्बा, राजनीतिक दलका प्रतिनिधि, टोल विकास संस्थाका प्रतिनिधि, विद्यालयका प्रतिनिधिको सहभागिता रहेको थियो ।