नेपालगञ्जमा निषेधाज्ञा जारी

बाँके । सामाजिक संजालमा लेखिएको विषयमा विवाद उत्पन्न भएपछि नेपालगञ्जमा निषेधाज्ञा जारी छ ।

जिल्ला प्रशासन कार्यालय बाँकेले एक सूचना जारी गर्दै सामाजिक संजालमा लेखिएको विषयलाई लिएर उत्पन्न विवादका कारण शुक्रबार बिहान ६ बजेदेखि राति ८ बजेसम्म नेपालगञ्ज उपमहानगरपालिका क्षेत्रभित्र निषेधाज्ञा जारी गरिएको जानकारी गराएको हो ।

प्रशासन कार्यालयले जारी गरेको सूचनामा नेपालगञ्ज उपमहानगर (पूर्वमा राप्ती नदी पुल, पश्चिममा खजुरा रोडको इन्द्रपुर जाने बाटो, उत्तरमा राँझा चोक र दक्षिणमा जमुनाहा सीमा नाका) का चार किल्लाभित्र कुनै प्रकारको भेला, जुलुस, सभा, बैठक वा प्रदर्शन वा पोस्टर, पर्चाजस्ता प्रचार सामाग्री टाँस्न वा लेख नपाइने गरी तथा हुलदङ्गा वा अशान्ति गर्ने उद्देश्यले एकै ठाउँमा पाँच जना भन्दा बढी मानिस जम्मा हुन नपाउने उल्लेख गरिएको छ ।