मकवानपुरको फाखेलमा निर्माणधिन गुम्बालाई आर्थिक रकम सहयोग

मकवानपुर । मकवानपुर जिल्लाको इन्द्रसरोवर गाउँपालिका वडा नम्वर ४, फाखेल पुरण्डीस्थित निर्माणधिन रिगडुग दोङटुग लिङ गुम्बालाई आर्थिक रकम सहयोग भएको छ ।

उक्त गुम्बालाई अमेरिकाबाट ८ लाखभन्दा बढी रकम सहयोग गरिएको हो । गुम्बालाई तामाङ सोसाईटी अफ अमेरिकाका पूर्व अध्यक्ष इन्द्र तामाङको पहलमा ६ हजार १ सय ७८ अमेरिकी डलर (करिब ८ लाख २० हजार रुपैयाँ) रकम सहयोग प्राप्त भएको हो ।

गुम्बा समितिका अध्यक्ष धिरज लामा र लामा गुरुको आग्रहपछि विभिन्न व्यक्ति तथा संस्थाबाट सहयोग संकलनको अनुरोध आएपछि सामाजिक सञ्जालको माध्यमबाट रकम जम्मा पारिएको तामाङ कल्चर एन्ड बुद्धिस्ट सेन्टरका संयोजक रहेका पूर्व अध्यक्ष तामाङले जानकारी दिए ।

सो संकलन रकम नेपाल पठाउनका लागि सोमबार पूर्व अध्यक्ष तामाङले तामाङ सोसाईटी अफ अमेरिकाका वर्तमान अध्यक्ष बुद्धिमान तामाङलाई हस्तान्तरण गरेका छन् ।

स्थानीय सानुमाइली तामाङले १ रोपनी ८ आना र कान्छी रुम्बाले दान गरेको १ रोपनी १ आना १ पैसा जग्गामा गुम्बा निर्माण भइरहेको छ ।