मकवानपुर प्रहरीद्वारा अवैध काठ बरामद, एक जना पक्राउ

मकवानपुर । प्रहरीले मकवानपुरको बागमती गाउँपालिका वडा नं.२ भुर्कुसबाट गएराति अवैध काठ बरामद गरेको छ ।

प्रहरीले १८७ पिस २१७.४२ क्यूफिट चिरान सालको काठ बरामद गरेको मकवानपुरका प्रहरी नायव उपरीक्षक लक्ष्मी भण्डारीले जानकारी दिए ।

प्रहरी नायव उपरीक्षक भण्डारीका अनुसार, भुर्कुस टोलबाट बा.५ ख ५४०० नम्बरको टिपरमा लोड गर्दै गरेको अवस्थामा सो परीमाणको काठ बरामद गरेको हो ।

उक्त बरामद काठ, ट्रिपर र ट्रिपर चालक मकवानपुरगढी गाउँपालिका वडा नं. २ बस्ने २५ वर्षीय आईत सिङ मोक्तानलाई नियन्त्रणमा लिएको प्रहरी नायव उपरीक्षक भण्डारीले बताए ।

प्रहरीले नियन्त्रणमा लिएको काठ, ट्रिपर र ट्रिपर चालक मोक्तनलाई आवश्यक अनुसन्धान तथा कारवाहीको लागि आइतबार बिहान डिभिजन वन कार्यालय मकवानपुरलाई बुझाएको जनाएको छ ।