भीमफेदीबाट लागूऔषध गाँजा र ट्रकसहित एक जना पक्राउ

मकवानपुर । मकवानपुरको भीमफेदी गाउँपालिका वडा नम्वर १, सामरी पुल नजिकै भित्री सडकखण्डबाट आज बिहान लागूऔषध गाँजासहित एक जना पक्राउ परेका छन् ।

पक्राउ पर्नेमा हेटौंडा उपमहानगरपालिका वडा नम्वर ४ बस्ने अन्दाजी ५१ वर्षीय पुर्णबहादुर रुम्बा रहेको जिल्ला प्रहरी कार्यालय मकवानपुरले जनाएको छ ।

रुम्बालाई विशेष सुचनाको आधारमा बागमती प्रदेश प्रहरी कार्यालय हेटौंडा र जिल्ला प्रहरी कार्यालय मकवानपुरबाट खटिएको संयुक्त प्रहरी टोलीले पक्राउ गरेको हो ।

प्रहरीका अनुसार, बिहान सवा १ बजेको समयमा उक्त स्थानमा रोकी राखेको बा.३ ख ४६१ न. को मिनि ट्रकलाई चेकजाँच गर्दा लुकाई छिपाई राखिएको १७५ किलो लागूऔषध गाँजा बरामद भएपछि निजलाई पक्राउ गरिएको हो ।

पक्राउ परेका रुम्बा ट्रक चालक हुन् । पक्राउ परेका उनीमाथि प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।