अवैध लागूऔषधसहित दुई जना पक्राउ
तु खबर संवाददाता
काठमाडौं । प्रहरीले छुट्टाछुट्टै स्थानबाट लागूऔषधसहित दुई जनालाई पक्राउ गरेको छ । प्रहरीले झापा र पाँचथर जिल्लाको विभिन्न स्थानबाट लागूऔषधसहित उनीहरुलाई पक्राउ गरेको हो ।
प्रहरीले झापाको दमक नगरपालिका–६ पूर्व बसपार्कबाट अवैध लागूऔषध ब्राउनसुगर ४ ग्रामसहित मंगलबार बिहान एक जनालाई पक्राउ गरेको छ । पक्राउ पर्नेमा इलामको चुलाचुली गाउँपालिका–५ बस्ने ४२ वर्षीय राजेन्द्र राई रहेका छन् । उनलाई इलाका प्रहरी कार्यालय दमकबाट खटिएको प्रहरीले उक्त लागूऔषधसहित पक्राउ गरेको हो ।
यस्तै, पाँचथरको फिदिम नगरपालिका–४ गढीबाट अवैध लागूऔषध खैरो हेरोइन २० मिलिग्रामसहित एक जनालाई मंगलबार बिहान पक्राउ गरेको छ । पक्राउ पर्नेमा फालेलुङ गाउँपालिका–८ बस्ने २० वर्षीय वारुहाङ केरूङ रहेका छन् । जिल्ला प्रहरी कार्यालय पाँचथरबाट खटिएको प्रहरीले उनलाई उक्त परिणामको लागूऔषधसहित पक्राउ गरेकोे हो ।
ती दुबै घटनाको बारेमा प्रहरीले आवश्यक अनुसन्धानका साथै कानूनी प्रकृया अगाडि बढाएको छ ।
