अवैध लागूऔषधसहित ७ जना पक्राउ

काठमाडौं । प्रहरीले देशको छुट्टाछुट्टै स्थानबाट लागूऔषधसहित ७ जनालाई पक्राउ गरेको छ । प्रहरीले कैलाली र धादिङ जिल्लाको विभिन्न स्थानबाट लागूऔषधसहित उनीहरुलाई पक्राउ गरेको हो ।

प्रहरीले कैलालीको धनगढी उपमहानगरपालिका–१२ पट्रीघाटस्थित सडकबाट अवैध लागूऔषध ब्राउनसुगरसहित ३ जनलाई शनिबार पक्राउ गरेको छ । पक्राउ पर्नेहरुमा धनगढी उपमहानगरपालिका–७ बस्ने २३ वर्षीय भजौरा राना र २४ वर्षीय प्रकाश रानालाई र धनगढी उपमहानगरपालिका–८ धनगढीगाउँ बस्ने २८ वर्षीय सुरेन्द्र राना रहेका छन् ।

जिल्ला प्रहरी कार्यालय कैलालीबाट खटिएको प्रहरीले सु.प.प्र.०१–०१२ प ३७४ नम्बरको मोटरसाइकलमा सवार भजौरा र प्रकाशलाई २ सय ४० मिलिग्रामसहित तथा सु.प.प्र.०१–०१० प ९६८१ नम्बरको मोटरसाइकलमा सवार सुरेन्द्रलाई ५ सय १० मिलिग्राम ब्राउनसुगरसहित पक्राउ गरेको हो ।

यस्तै, धादिङको गजुरी गाउँपालिका–७ दरिङगालस्थित दरिङगाल खोला पुल नजिकैबाट अवैध लागूऔषध गाँजा करिब ४० किलोग्राम, मोबाइल ४ थान र नगद ८ हजार रूपैयाँसहित चार जना पक्राउ परेका छन् । सोही गाउँपालिका–४ बालुवा डाँडा बस्ने २७ वर्षीय सोम बहादुर तामाङसहित ४ जनालाई सो परिणामको लागूऔषधसहित आइतबार बिहान पक्राउ गरेको प्रहरीले जनाएको छ ।

उनीहरुलाई इलाका प्रहरी कार्यालय गजुरीबाट खटिएको प्रहरीले पक्राउ गरेको हो । ना.२६ प ३७४६ नम्बरको मोटरसाइकल र बा.प्र ०२–०१३ प ४०७६ नम्बरको मोटरसाइकलमा सवार उनीहरूलाई उक्त परिमाणको गाँजासहित पक्राउ गरेको हो ।

ती दुबै घटनाको बारेमा प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।