मकवानपुरमा साबेलले हिर्काएर एक जनाको हत्या, साथी पक्राउ

मकवानपुर । मकवानपुरमा आज बिहान एक व्यक्तिले आफ्नै घरमा सुतिरहेका साथीलाई साबेलले हिर्काएर हत्या गरेका छन् ।

जिल्लाको मनहरी गाउँपालिका वडा नम्वर ६ प्रतापुर लच्का घर भएका अम्मरबहादुर लोप्चनले आफ्नै ५० वर्षीय साथी जीतबहादुर मोक्तानको हत्या गरेको मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, बिहान साढे १ बजेको समयमा अम्मरबहादुरले आफ्नै घरमा सुतिरहेका जीतबहादुरलाई एक्कासी साबेलले हानेका थिए ।

टाउको र खुट्टामा चोट लागेर गम्भीर घाइते भएका जीतबहादुरलाई तत्काल उद्दार गरी चितवनको भरतपुर अस्पतालमा लगिएको थियो । उनको सोही अस्पतालमा उपचारको क्रममा बिहान ३ बजेर २० मिनेटको समयमा मृत्यु भएको प्रहरी नायव उपरीक्षक अर्यालले बताए ।

उनीहरु दुबै जना सँगसँगै निर्माण क्षेत्रमा मजदुरी गर्दै हिंड्ने गरेको र प्रायजसो अम्मरबहादुरकै घरमा सुत्ने गरेको पाइएको प्रहरी नायव उपरीक्षक अर्यालले बताए ।

प्रहरीले अम्मरबहादुरलाई साबेलसहित पक्राउ गरी घटनाको बारेमा आवश्यक अनुसन्धानका साथै कानूनी प्रकृया अगाडि बढाइएको छ ।

मृतक जीतबहादुरको शव हाल सोही अस्पतालमा राखिएको प्रहरी नायव उपरीक्षक अर्यालले जानकारी दिए ।