ट्रकको ठक्करबाट महिलाको मृत्यु, मकवानपुरका घलान पक्राउ

काठमाडौं । भक्तपुरको गठ्ठाघर चोकमा आज बिहान ट्रकले स्कुटरलाई ठक्कर दिँदा एक महिलाको मृत्यु भएको छ । मृत्यु हुनेमा ४१ वर्षीया नवीना देउला रहेको प्रहरीले जनाएको छ ।

प्रहरीका अनुसार, बिहान भक्तपुरबाट काठमाडौंको लागि छुटेको ना ८ ख २३११ नम्बरको १२ चक्के ट्रकल सोही दिशातर्फ गइरहेको बा.प्र. ०२–०३८ प ४४०१ नम्बरको स्कुटरलाई ठक्कर दिएको थियो ।

ट्रकको ठक्करबाट ४१ वर्षीया नवीना गम्भीर घाइते भएकी थिइन् । घाइते उनको उपचारको क्रममा भक्तपुर इन्टरनेशनल अस्पतालमा बिहान पौने ८ बजे मृत्यु भएको जनाइएको छ ।

दुर्घटनामा नवीनाका श्रीमान् जिते देउला भने घाइते छन् । उनको नागरिक अस्पतालमा उपचार भइरहेको बुझिइएको छ ।

ट्रक चालक मकवानपुरको मकवानपुरगढी–४ बस्ने ३८ वर्षीय बुद्ध बहादुर घलानलाई प्रहरी वृत्त ठिमीले नियन्त्रणमा लिई घटनाको बारेमा आवश्यक अनुसन्धान गरिरहेको छ ।