लागूऔषधसहित पाँच जना पक्राउ

काठमाडौं । अवैध लागूऔषध गाँजासहित प्रहरीले पाँच जनालाई पक्राउ गरेको छ । प्रहरीले सुर्खेत, कैलाली र सिन्धुली जिल्लाको विभिन्न स्थानबाट लागूऔषध उनीहरुलाई पक्राउ गरेको हो ।

प्रहरीले सुर्खेतको वीरेन्द्रनगर नगरपालिका–१२ भावर टोल बस्ने २४ वर्षीय सुरेश दमाई समेत २ जनालाई अवैध लागूऔषध ब्राउनसुगर ६ सय ४० मिलिग्रामसहित बिहीबार दिउँसो पक्राउ गरेको छ । जिल्ला प्रहरी कार्यालय सुर्खेत र लागूऔषध नियन्त्रण ब्यूरो शाखा कार्यालय सुर्खेतबाट खटिएको प्रहरीले सुरेशको घर तलासी गर्दा उक्त पदार्थ फेला पारी दुबै जनालाई पक्राउ गरेको हो ।

यस्तै, कैलालीको टीकापुर नगरपालिका–९ खक्रोलास्थित सडकबाट अवैध लागूऔषध खैरो हेरोइन ७ सय ८० मिलिग्रामसहित बिहीबार साँझ दुई जनालाई पक्राउ गरेको छ । पक्राउ पर्नेमा सोही नगरपालिका–३ बस्ने २० वर्षीय दिपक विश्वकर्मा समेत २ जना रहेका छन् । इलाका प्रहरी कार्यालय टीकापुरबाट खटिएको प्रहरीले उनीहरूलाई उक्त लागूऔषधसहित पक्राउ गरेको हो ।

यसैगरी, सिन्धुलीको दुधौली नगरपालिका–१ गिजीयानी बस्ने ६० वर्षीया दिपा बस्नेतलाई अवैध लागूऔषध गाँजा करिब ३ सय ग्रामसहित बिहीबार राति प्रहरीले पक्राउ गरेको छ । इलाका प्रहरी कार्यालय डकाहाबाट खटिएको प्रहरीले उनको पसल तलासी गर्दा उक्त गाँजा फेला पारी पक्राउ गरेको हो ।

ती सबै घटनाको बारेमा प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।