गाडीको ठक्करबाट सशस्त्र प्रहरीको मृत्यु

जनकपुरधाम । सिरहामा नम्बर नखुलेको गाडीको ठक्करबाट आज बिहान एक जना सशस्त्र प्रहरीको मृत्यु भएको छ । मृत्यु हुनेमा सशस्त्र प्रहरीका सई लक्ष्मण यादव रहेका छन् ।

प्रहरीका अनुसार, बरियारपट्टी गाउँपालिका–१ कचनारी बोर्डर नजिक उक्त गाडीले ठक्कर दिँदा उनी घाइते भएका थिए । घाइते उनको उपचारको क्रममा प्रादेशिक अस्पताल लहानमा मृत्यु भएको हो ।

मृतक यादव गाडी बोर्डर नजिक चेक जाँचका लागि खटिएका थिए । ठक्कर दिने गाडीको खोजीकार्य गर्नुका साथै प्रहरीले घटनाको बारेमा आवश्यक अनुसन्धान गरिरहेको जनाइएको छ ।